الأربعاء، 17 أبريل، 2013

الفقراء اولا ياولاد الكلب


صندوق الدنيا 
الفقراء اولاً يا ولا الدوجز !! 
عارف يا عم مرسى انت شكلك شبه كل المصريين اللى طالع عنيهم وكفرانيين ،،، بس للأسف قلبك مليان جحود و نكران لفضل الشعب دا !! 
عارف يا مرسى و يا كل بغبغانات السياسه فى مصر الناس خلاص باعت الحديد و الخشب وحتى الصفيح !! 
عارفين العامل بتاع المصنع اللى كفران طول اليوم علشان يقدر يأكل ولاده مره لحمه فى الشهر و يكفيهم طعميه من غير فول باقى الشهر ؟؟!! ،،، الراجل دا خلاص بقى طموحه دلوقتى بجنيه عيش فى اليوم و اتعشت كدا ؟؟!!
الناس بقيت تكلم نفسها فى الشوارع وبقى الحاج أحمد بيحسب المرتب هيوصل ليوم عشره ولا يعمل جمعيه فوق الجمعيتين اللى عاملهم !! 
عارفين ان علب الصفيح بقى هاى ليفيل بالنسبه لأطفال الشوارع ،،، بقى مستوى صعب يوصلوله !! 
الأول عارفين ان بقى فى شوارع الاطفال مش اطفال شوارع ؟!! 
حاسين بقدر معانات أهالى الشرقيه اللى بيشربوا مياة مجارى ؟؟!! 
حاسين بكم الاوبئه والأمراض اللى انتشرت فى البلد وكل اللى عمله وزير الصحه انه عمل حمله لإخصاء كلاب الشوارع علشان مايخلفوش و يملوا البلد كلاب ؟؟!! 
عارفين ان ٧٠ ٪ من الأدويه بقيت بح مفيش ؟؟؟!!! 
وطبعاً الحشيش دلوقتى بقى بيتباع فى مراكز معتمده لخدمة الدماغ المصرى و على مرأ ومسمع من الجميع و البيه أمين الشرطه بيعمل احلى دماغ ببلاش !! 
عارف يعنى ايه عمال يستردوا حقهم و يرجعوا مصنعهم وحكومة الرئيس المؤمن تطعن على الحكم !! 
عارف يعنى ايه سواقين القطارات يتهددوا بالمحاكمه العسكريه علشان البيه الفريق أعلن التعبئه العامه فجأه ،،،، وكل ذنبهم قالوا آه بصوت عالى ازعج الشيخ مرسى !! 
عارف يعنى ايه ابن يشوف الكسره فى عين أبوه علشان ماقدرش يجبله طقم جديد على بداية السنه ؟؟!! 
حطوا استراتيجيات و ارسموا وخططوا و احكموا وعارضوا و طلعوا الفقير من حساباتكم و دسوا عليه بأوسخ جزمه فى رجلكم ،،، مانتوا خلاص بقيتوا بهوات وبشوات ،،،، الحركه بحساب و الكلمه بألوفات ؟؟!! 
بس هتفضلوا فى نظرى كلكم جرابيع لأنكم فى نفس الوقت اللى طلعتوا الفقير من حساباتكم كنتوا برا دايرة الانسانيه و الذئاب اللى جواكم انطلقت علشان تنهش اى حد يقف فى طريقها !! 
بس للعلم عمر الذئب ماشبع و هيفضل طول عمره خاين و جعان !! 
فيكم اللى قال الحريه اولاً و تانى قال العداله اولاً وواحد رخم قال نعمل احلال و تجديد للشعب او نستورد شويه من الصين !!! 
و فيكم اللى فضل يضحك على الناس بجنة على الارض و تاجر بأسم الله اللى هو أغلى عند الفقير من نفسه بمراحل !! 
بأصوات الفقير اللى عايزين تسجنوا و تكتموه بقيتوا أفنديه ببدل و كرفتات !! 
نسيتوا ان البلد دى صحابها الاصلين هما اللى نايمين تحت الكبارى و عايشين على أمل يلاقوا لقمه فى آخر الليل !! 
علوا فى صوتكم كمان وكمان استخبوا ورا قيم الانسانيه وداروا مخالب الذئب ورا ابتسامة الملاك !! 
قولوا اللى انتوا عايزينه ،،، اكذبوا عليا و على كل فقير فى البلد دى و قول يا بيه بصوت ناعم و حنين الفقراء اولاً لكن انا هفضل اقولها بوضوح و بصوت يكسر قزاز اوضكم المكيفه ،،، و يخرم ودانكم 
الفقراء اولاً يا ولا الكلب 
الفقراء اولاً يا ولاد الدوجز !!