د. بلتاجى .. أديك تقول ماخدتش
من ابو سويلم في 1 أكتوبر، 2012، الساعة 11:02 مساءً ·
أأقولك انا عملت أيه لمصر ف ال100 يوم يابلتاجى !! .. بس علشان تعرف انا أديت أيه لمصر لازم تعرف الاول أنا برنامجى اليومى أيه
كل يوم بأصحى الصبح انزل لشغلى وأحرق أعصابى وانا رايح وجاى من فوضى المرور - اللى ريسك قال حاحلها - وامتع عينى بأكوام الزبالة اللى ع الطرق الرئيسية - اللى ريسك عاوزنى أمسك مقشة وجاروف والمها - .. أدخل مكان شغلى وكلى حماس عشان أشتغل وأنتج واكتشف ان مفيش راتب -لو أول الشهر - لأن الاوضاع سيئة وحال البلد واقف وبالتبعية مفيش فلوس .. أرجع بيتى ااقابل محصل بيطالبنى بفاتورة عن كهربا مقطوعة وعلى الفاتورة كمان فلوس زبالة مابتتشالش .. ده بخلاف اللى انا بأدفعه للزبال اول شهر
لو رجعت ولاقيت حد من عيالى عيان بأقوم أجرى بيه على دكتور خاص فيزيته بالشيىء الفلانى وما باروحش مستشفى حكومى لأنى مش مستغنى عن عيالى .. يكتب لى روشتة علاج محترمة .. انزل أدور عليها فى الصيدليات وأكتشف ان الدواء رغم غلوه ناقص وأضطر اجيبه من سوق سودا بضعف تمنه وربنا الشافى
أصحى تانى اودى العيال مدرستهم الخاصة اللى مصاريفها تقطم الوسط .. لأن التعليم الحكومى فاشل وفاسد ولا فيه اى قيمة تعليمية .. وانا عارف ان أخرتها حيتخرجوا لسوق عمل شبه مقفول الا للواسطة والمحسوبية اللى باقابلها وبأشوفها بعينى كل يوم ولسه موجودة .. بس أهو باحاول أوفر لهم الاحسن وربنا كريم
أصحى يوم تانى أروح أأقضى مصلحة حكومية وعلى كل مكتب لازم أدفع فلوس "الشاى" والا المصلحة مش حتخلص واليوم حيضيع .. ولو أتصلت بالرقم بتاع الرشاوى والله لا ييجوا يشمعوا المبنى بالكامل من بابه - ده لو جم أصلآ - الا من رحم ربى
باروح بيتى اخر اليوم .. أفتح التليفزيون وأتفرج على الاخبار .. يرتفع الضغط والسكر .. من أخبار واحد فى منصب تنفيذى بدرجة رئيس مفتقد ترتيب الاولويات وبيكلمنى فى مواضيع أنشاء لاعلاقة لها بالواقع وعن أسعار اكل وشرب ماعرفش موجودة فين ولا هو بيجيبها منين ولا هى فى انهى سوق
أغير القناة اسمع أخبار منيلة بنيلة عن حتة من بلدى ليا اتنين اخوال دمهم سال عليها وراحوا فيها فى 67 و73 وهم بيدافعوا عنها وبيقولولى انها النهارده خارج السيطرة
اتخافش يابلتاجى .. انا كمواطن صالح بيسمع الكلام مش حاحاسب ريسك بعد ال100 يوم .. لأنى أصلآ ماصدقتش اللى قاله من ان المشاكل دى كلها تتحل فى 100 يوم .. اللى صدقك يبقى يحاسبك .. وعلى رأى المثل: انت تبيع بالسعر اللى انت عايزه .. لكن مين حيشترى منك.
أديك كمان !! مالوش لازمه لأنى عارف أخرتها .. حا اديك تقول ماخدتش
