هالة وحكاياتها ،، تدوينات جميلة للصديقة هالة محرز

هو المسيح جراله ايه ؟؟؟

     .....واحنا عايشين ف ايرلندا الشمالية....ولادي استضافو مايكل عندهم ف البيت كانوا كلهم عندهم اربع سنين او خمسه...بس بقي مايكل قضي عندنا اليوم وانا بقي باوصله عند أهله ف اخر اليوم....سايقة بقي وكده...مايكل: المسيح اتصلب!!....عيالي: لا يا مايكل انت غلطان ...المسيح طلع عند ربنا!!!...اخ...ليه كده؟...ف سري طبعا....وانا قافشة ف الدركسيون ومطنشة خالص....عيال بقي ...وسيبيهم ياهالة يهلفطوا...مايكل وصوته علي: انا باقولكم المسيح اتصلب!!!...مامتي قالت لي كده!!!...عيالي الاتنين : لا لا هو عند ربنا ....هو ماتصلبش ومامتش ..مامتنا قالت لنا كده!!!!!.....هو راجع تاني........اوبااااااا....وانا بقي باصفر ولسه برضو قافشة اكتر واكتر ف دريكسيون العربية....ومقررة أطنش خالص...عيال ويهلفطوا مابدالهم.....ل حد ماحصلت الطامة الكبري...او الكابوس....عيالي قرروا يستشهدوا بيه!!!!....مامي...هو المسيح اتصلب ومات والا لا....؟!....ايه ياجماعة؟!...فيه ايه بس؟!....وانتو مال اهلكم بالمواضيع دي دلوقتي؟!....ومع إلحاح السؤال....اضطريت اجاوب....انا : مايكل....هو انت مامتك قالتلك ايه؟....مايكل:...المسيح اتصلب ومات.....انا: هو ياحبيبي اتصلب...ومات طبعا....عيالي طبعا انزعجوا جداً....قلتلهم استنوا عليا بس...انتو مامتكو "اللي هو انا"...قالتلكم ايه؟!...عيالي: المسيح ماتصلبش واترفع عند ربنا....قلت لهم بالظبط هو لا اتصلب ولا حاجة..هو اترفع عند ربنا...smile emoticon..كل واحد يصدق مامته وفكوني انا من ام الأسئلة دي....تمام كده؟!...المسيح اتصلب عند مامة مايكل...واترفع عند مامة فرح ونديم....هو ف الحالتين مش موجود يقولنا حصل له ايه....كل واحد يصدق مامته وخلاص...أبوكم ع اللي جابوكم كلكم....ليه الأسئلة الصعبة دي....

بسمك ربى 

لما سافرنا دبي....قررت ان العيال لازم يتعلموا كويس....كويس عدل يعني.....انا بأحب استثمر ف التعليم.......العلام أحسن شئ....والعلم سلاح وكدهون.....دخلت ولادي مدرسة عظيمة مشهود لها جامد اوي خالص يعني...قلت الواحد مش عارف ح يعرف يكمل مصاريف المستقبل والا الزمن مخبي ايه!!....المدرسة دي كانت بقي عليها تحذيرات كده اخلاقية انها مدرسة فاكة ومختلطة!!....ومتسيبة فيما عدا التعليم!!...او دي السمعة اللي كانت طالعة عليها!!...من خبرتي العملية ماكانتش كده خالص.....المهم ساعتها قلت مش مهم.... ده حاعرف اتصرف فيه...ابنك علي حسب ماتربيه....الحكاية دي حصلت لما نديم ابني كان ف أولي ابتدائي....أحب أعرفكم علي نديم ابني .....نديم ده بقي قمة الالتزام كله.....ابو وأم واخت الالتزام يعني.. انت ماعليك لو طبعا عندك سلطة "authority"....ب لغة كومبيوتر زمان....كوماند.....انتر....خلاص....كده لبس نديم.....-)....المهم دخلت بالليل احكيله حدوتة قبل النوم...بعد ماخلصت الحدوتة.....نديم راح فجاة وبحركة عصبية ...وبسرعة وتجهم اتقلب علي جنبه اليمين!!.....وراح قايل.... بِسْمك ربي ....وضعت چنبي "بتعطيش الجيم" وبك ارفعة!!.....انا : تصبح علي خير ياحبيبي......نديم: تصبحي علي خير يامامتي.....انا حلو؟!....انا : ايوة ياحبيب ...انت حلو علي طول....انت أصلا قمر.....نديم وهو مديني ضهره : لا انا بأسأل انا حلو أني قلت الكلام ده؟!....انا: كلام ايه ياحبيب؟!.....نديم وهو لِسَّه مكشر: انا نايم علي جنبي اليمين وبأقول باسمك ربي وضعت چنبي وبك ارفعه!!!!...انا: ايوة ياحبيبي ....حلو ....كلام جميل....مادام انت مبسوط انك بتقوله....نديم : طيب انا لازم أقوله تلت مرات!!!...انا: ميجراش حاجة يانديم قوله تلت مرات......نديم: وان....بِسْمك ربي .....للاخر!....تو : مره تانية....ثري: تالت مره!!!!!....انا حلو تاني؟!....انا: ايوة ياحبيبي حلو جدا جدا خالص يعني ل حد السما....نديم : ممكن أسالك سؤال؟!....انا: اتفضل....نديم: طيب ممكن اقعد الاول؟!....انا: ايوة ممكن تقعد ياحبيبي....انا أصلا مش عارفة انت مديني ضهرك ليه وبتكلمني!!.....نديم: المدرس قال كده!!!....انا: المدرس قالك إدي ضهرك للناس؟!.......نديم : يووووه يامامتي!!!....لا المدرس قال نام علي جنبك اليمين وقول كده!!!!....انا: طيب ياسيدي خلاص...ممكن تقعد.....نديم: أوكيه يامامتي....وقعد نديم ف السرير وقالي....مامي ....هو مين كرنبي ده ؟!......انا: كرنبي؟!..كرنبي ايه؟!....كرنبي مين؟!.....نديم: .ده اللي احنا بنقوله!!!...انا: احنا بنقول كرنبي؟!.. انا مش فاهماك يانديمو الحقيقة!!!......نديم بقي زهق وقالي مش احنا بنقول"بِسْم كرنبي....وضعت چنبي وبك ارفعه"!!!!.....انا عايز اعرف مين كرنبي ده؟!....هه؟....هه؟؟؟....مين كرنبي يامامتي؟!....يانهار طين؟!....كرنبي يانديم؟....وتلت مرات....وجنبي اليمين....والفيلم ده كله؟!....كرنبي!!...هيا دي بقي المدرسة الفاكة اللي عليها تحذيرات؟!!!!!!....ياخسارة فلوسك وشقي عمرك ياهالة ف التعليم.....ال كرنبي ال.....طيب يانديمو....روح بقي نام ومتقلش آيتها شئ ف البيت ده من اللي المدرس ده بالذات بيقول عليها إلا لما تسألني الاول !!!......كرنبي؟!...هاهاها....هوهوهوهو.....هيهيهيهيهي .....يالهوي......Nadeem Talaat

الحمام 

وانا ف أواخر حملي كده قررنا نوضب حمام البيت !!!!....محدش يسال ليه!!...انا لو اعرف أقول......:)....هو مكنش أواخر حملي اوي....كان الشهر السابع....المهم يعني كنت ف أواخر الحمل ده ومعنديش حمام وباشتغل....حياخد أد ايه الحمام ده ياجماعة؟!.....قالك اسبوعين...النهاية... ولدت  ف التاسع.... والأسبوعين بقو شهرين!!..تلاتة....والعمال حضرتك ف البيت...:-)..رجعت البيت بعد الولاده بقي انا وفرح....والعمال!!!...ومن غير حمام..!!..كنت قاعدة محبوسة ف اودتي اغلب الوقت...وباقابل العمال ف الطرقة...:)....العمال دول ادركو تماما ان ده مش اي منظر يعني حد ح يطبخ والا حتي يعملهم شاي!!!.....انا الحقيقة عملت اللي عليا....وريتهم مكان الحاجات ف المطبخ من اول يوم وقلت لهم اللي ياكل علي ضرسه وكده...اديكو شايفين العيلة علي أيدي يعني منك له.....ولما تعملوا شاي أبقوا اعميلولي معاكو...:-)...اشتريتلهم فطار طعمية وفول مره.....ف تاني يوم عملوا شاي وخبطوا عليا ناولوني كوباية شاي تقيل ب سكر كتير....مش فتلة يعني.....:)...الأغاني كمان كانت ع الكيف.....انا اجيب محطة الأغاني وهيا تشتغل من غير ماحد يفرض ذوقه.....احنا كلنا عبيد الراديو.....:)...المهم بقي مره كنت مضطرة اخش الحمام  ف ركبوا قاعده التواليت   عشان الزنقة....سبت فرح ف الاوده....طلعت م الحمام لقيت واحد فيهم شايل فرح!!!....ومبتسم جدا....يانهار اسود.....ياوقعة!!!....ده الراجل ملطخ بوية علي إسمنت !!!.....باظ الطقم الشيك للأبد!!!...اتاريه وانا  ف الحمام سمع فرح بتعيط ....صعبت عليه دخل الاوده وشالها.....:-)....قالي انا متأسف يامدام دخلت اودة حضرتك لان فرح كانت بتعيط!!....وفرح نايمه ف حضنه مستكينة  تماما...المنظر الحقيقة كان جليل....اكبر من خوفي ان واحد شكله متوسخ كده وشايل اول بيبي ليا.....يعني بيبي معقم...:)...بس شكل فرح كان مطمن....واعتبرتها من الوقت ده مساعده كبيرة جدا....ربنا بعتهالي....خد والنبي يامحمد العيلة علي ايدك شوية علي بال ما أخرط البصل وكده الله لايسيئك....:)....بلاهو الحمام اصلا.....:)...حد بيشيل فرح  ويساعدني وابقي كمان مطمناله!!!...كنز....الأيام اللي بعد كده ماكانوش يبدأوا شغل الصبح من غير مايتصبحوا ب وش فرح!!!....مش بس كده....بداوا كمان يشتريولي غدا معاهم علي حسابهم!!!...وكله عشان خاطر فرح...:)...وانا عليا بقي المخللات او اي شئ م التلاجة موجود.....:-)...ده غير الشاي...:).... وبعد ما كنت متضايقة من وجودهم ف البيت والحمام والتنضيف وكده....وحشوني بعد ماخلصو ومشيوا...والبيت فضي عليا ومحدش اصلا لا شال فرح ولا عمل لي شاي...:-)...ولا جابلي كباب طبعا اصلا ...:-)....أحب أضيف طبعا ان شغلهم ف الحمام كان زي الزفت....مفيهوش اي فن او إتقان اصلا خالص.....بس برضو وحشوني....:).......بلاه الحمام....تاني...:)...ذكريات

ايفيلين 

وصحيت الصبح علي خبط ع الباب.....فتحت الباب....لقيت ايڤيلين جارتي....ايڤيلين: انا افتكرتك موتي!!!!....ليه بس يا ايڤيلين يا اختي كده ع الصبح!!!!....الناس ملافظ!!!.......لا ياستي اديني عملتلك مفاجاة ولسه عايشة....:-(...لو يريحك يعني اموت نفسي معنديش مانع!!....ايڤيلين : اصلك مخبطيش عليا بقالك يومين....انا: معلش يا ايڤيلين يا اختي كان مودي مش ف أحسن حالاته والنوم حلو ف الأيام دي...وتعبانة م الشغل كالعاده.....ايڤيلين: طب إنتي كويسة....انا: اه الحمد لله....ايڤيلين: طب ممكن تساعديني وتشليلي الشنطة ل حد الجراچ!!!...انا؟!....شنطة؟!.....أوكي  ماشي يا ايڤيلين ....حاضر ياستي.....لو مستعجلة ممكن انزل بالبيجاما......عداني العيب أهو!!!!!! وانفتحت ايڤيلين ف وشي....انا مش قادرة اشيل الشنطة....انا: ليه يا ايڤيلين؟!....مانتي اللهم لاحسد بتتنططي طول النهار ولا شابه عندها عشرين سنة!!....ايڤيلين: انتو فاكرين نفسكو مش حتكبروا؟!....انا عندي ٧٦ سنة!!...الشباب "اللي هو انا...:-)"....مش فاهم يعني ايه الواحد جسمه يخذله.....احنا مش عايزين منكو حاجة!!!!!....قدروا موقفنا طيب!!!!....احنا تعبانين!!!!...انتو مين يا ايڤيلين وانتي لابسالي بنطلون بمبي كده ع الصبح!!!....إنتي زي الفل...واحنا مين الشباب ده؟!.....بصي بقي....وخلصيني من ام اليوم ده......اللي إنتي عايزاه حاعمله.....ماشي؟!.....ايڤيلين: إنتي عارفة انك لو ساعدتيني ....لما تكبري وتبقي أدي ح تلاقي ناس تساعدك؟!!!....انا: ايوة عارفة كده كويس....سلف ودين...ايڤيلين: طب إنتي عارفة أني مبقتش اعرف اطلع السلم؟!....انا: لا مش عارفة....لأنك بتتنططي ف العمارة طول النهار....ايڤيلين: طب احنا قاعدين بنتكلكم بقالنا نص ساعة ومعزمتنيش علي كوباية قهوة؟!....انا :قهوة ايه ياماما اللي حاعزمك عليها....إنتي أصلا معاكي مفتاح البيت!!!!....وبعدين انتبهت فجاة ....واتنرفزت الحقيقة....هيا مالها شغالة تلطيش ف اللي جاوبوني كده علي ام  الصبح؟!!!!!!....وبابص لايفلين لقيتها وشها متنرفز واحمر زي الدم.....ولسه قاعدة تتخانق....وانتبهت فجاة....دي بتتخانق مع روحها....مش معايا انا!!!......قلتلها ايڤيلين تعالي عندي....والا أقولك بلاش ...قبل ماتتزرزري ....انا حاجيلك....ورحت  رايحة عند ايڤيلين واخدتها  ف حضني......راحت معيطة.....:-(...البني آدم مننا خيخة...:-(

خالتي

كان عندي خالة اتعلمت الصلاة علي كبر....وهي بتقرا الفاتحة كانت بتقول "اهدنا الصراط المستكين"!!!!...لا ياست انتي اسمه المستقيم....مش المستكين!!!!!وفشلنا كلنا نقنعها انه المستقيم ....المستقيم....فاهمه؟....تقول طيب ماشي...وترجع تاني للمستكين بتاعها!!!.ده قران يا اختي مستقيم يعني مستقيم ما بنحورش احنا....كانت بترد تقول مستكين يعني من الاستكانة....والحنية والهدوء....مستقيم ده يعني ايه؟!!.مابنسالش يا خالتي....دي آيات قرآنية مستقيم يعني مستقيم ....مش ح نالف احنا!!!!....ولأنها كانت متهورة وعنيدة... ف فضلت تقول اهدنا الصراط المستكين وهي بتصلي الخمس صلوات!!!!...او يمكن مش عند....يمكن يكون فهمها كده وخلاص.....الله يرحمك يا خالتي ...وحشتيني.....ياريت بقي وانتي هناك تبلغينا مستقيم والا مستكين والا مش فارقة؟!...

للحكايات بقية